Dommedagskomedie tatt ut til dramakonkurranse i Cannes

Dummedag er den einaste norske serien som er tatt ut til Canneseries i år, og er med i konkurransen om prisen for beste serie.

Serien kom på NRK TV i november, og får sin internasjonale premiere under Canneseries, med den engelske tittelen Dumbsday.

Dummedag er produsert av Seefood TV for NRK. Manus er ved Christopher Pahle, regissør er Erlend Westnes, produsent for Seefood TV er Aleksander Herresthal, og Marit Støre Valeur er eksekutiv produsent for NRK. Serien er på ti x 30 minutter.    

– Vi er utruleg glade for at at Dummedag blir løfta fram av Cannes Series. Dette er ei stor anerkjenning av kvaliteten på arbeidet til både serieskaparar, skodespelarar og crew, som alle har jobba hardt for å laga denne serie, seier produsent Aleksander Herresthal i Seefood TV.

Canneseries er ein viktig internasjonal festival for tv-serier, og finn stad parallelt med tv-messa MIP i Cannes. Festivalen omfattar tre konkurranseprogram: Dramaserie i langt format, dramaserie kortformat og dokumentar. Åtte seriar er tatt ut i konkurransen for seriar i det lange formatet, og Dummedag konkurrerer med seriar frå m.a Danmark, Tyskland, Kina og Brasil om prisen for beste serie.

– Uhemma humor 

Dummedag er ein postapokalyptisk komedie der Noreg er ramma av eit hjernevirus som gjer folk dumme, og seks overlevande må frakte vaksinen mot idiotpesten til ein trygg stad. Serien kom på NRK TV hausten 2023. 

Endetidsserie med endetarmshumor, kallar NRK sjølve serien i sin nettspelar.

– Høgda av uhemma humor som nordmennene er så glad i (…) som om Tolkien hadde skreve Taparanes herre, heitar det i Canneseries’ presentasjon av Dummedag.

 – Det er stas at ein komedie blir tatt ut til hovudprogrammet i Canneseries. Det skjer svært sjeldan, og det må jo bety at komikken i serien lèt seg omsetja for eit internasjonalt publikum, seier Seefood-produsent Aleksander Herresthal.

– Vi er svært takksame for at NRK våga å satsa på ein nyskapande og annleis serie som blandar fleire sjangrar. At NRK tek modige kunstnariske val i bestillingane sine, er med på å løfta kvaliteten og breidda på seriemangfaldet i Noreg, seier Aleksander Herresthal

Under Canneseries i fjor vann Makta, produsert av Motlys for NRK, pris for beste serie og beste musikk.