NFI og Virke måler pulsen på produksjonsaktiviteten

Undersøkinga er tenkt gjennomført to gonger i året, og er utforma for å vere rask å svare på og enkel å analysere. Målet er å få betre innsikt i faktisk produksjonsaktivitet, marknadsutvikling og bruk av plattformer. Målinga vil kunne gi eit tydeleg augeblikksbilete av situasjonen slik han er no og korleis utviklinga er i eit halvårsperspektiv.

Betre innsikt

– For å kunne utforme treffsikre verkemiddel og prioritere ressursar rett, treng vi betre innsikt. Denne målinga er eit viktig steg på vegen, seier avdelingsdirektør Jørgen Risvik-Jellum i Norsk filminstitutt (NFI)

– Med dette samarbeidet vil NFI og Virke bygge eit solid kunnskapsgrunnlag for heile bransjen, og invitere til ein meir innsiktsbasert dialog, seier avdelingsdirektør  Jørgen Risvik-Jellum.  

Håper mange svarer

Pulsmålinga skal gå ut til norske produsentar , og deira bidrag er heilt avgjerande for kvaliteten på innsikta.  

– Vi er glade for at vi og NFI nå i samarbeid set i gang ei pulsmåling som viser aktivitetsnivået i produksjonsselskap i film- og tv-bransjen.  Vi håper så mange som mogleg bidrar til undersøkinga, så vi får gode tall vi kan bruke i arbeidet vårt for bransjen, seier Åse Kringstad, leder i Virke Produsentforeningen.

Eit høgt svargrunnlag vil styrke kunnskapsdelinga i bransjen, gi betre grunnlag for politikkutforming og styrke dokumentasjonen overfor styresmaktene.

Behandlast konfidensielt

Svara skal behandlast konfidensielt, slik at produsentane kan kjenne seg trygge på å dele aktivitetsnivået sitt. Berre aggregerte tal blir publiserte. Målinga gjekk ut 22. august og har frist 29. august. Resultatet av pulsmålingane vil gjerast tilgjengeleg på NFIs nettsider i september.