Stortingets familie- og kulturkomité besøkte Berlinalen for møter med filmbransjeaktørar. Foto: NFI
Norsk filminstitutt deltok under den 75. internasjonale filmfestivalen i Berlin for å fremme norsk film og skape møteplassar mellom norsk bransje og internasjonale aktørar.
Tre norske filmar var tatt ut til årets Berlinale.
Dag Johan Haugeruds spelefilm Drømmer, del to av hans trilogi Sex, Drømmer, Kjærlighet, hadde internasjonal premiere i hovudkonkurransen på filmfestivalen i Berlin 19. februar.
Internasjonal premiere på Drømmer under Berlinalen. Foto: NFI
Emilie Blichfeldts debutfilm Den stygge stesøsteren ble invitert til Panoramaprogrammet.
Europapremiere på Den stygge stesøsteren under Panorama. Foto: NFI
Vibeke Løkkebergs dokumentarfilm The Long Road to the Director's Chair hadde premiere i Forum Special-seksjonen. Filmen bygger på opptak frå Vibeke Løkkebergs deltaking på det første internasjonale kvinnefilmseminaret i Berlin i 1973, som nylig vart gjenoppdaga og restaurerte av Nasjonalbiblioteket.
Serien Heajastallan – Bryllupet av serieskaper Åse Kathrin Vuolab deltok i seriemarkedet.
Norsk filminstitutt koordinerte ei rekkje aktivitetar for å leggje til rette for at norsk filmbransje knyter og styrker kontaktar med internasjonale aktørar. Norsk filminstitutt promoterte norsk film på European Film Market under den felles nordiske merkevara The Five Nordics. The Five Nordics er eit samarbeid mellom filminstitutta i Danmark, Finland, Island, Noreg og Sverige. Målet er å fremme samarbeid om audiovisuelle prosjekt mellom dei fem landa, samt å promotere nordiske prosjekt på større marknader og festivalar.
Norsk film- og seriebransje utmerkte seg med fleire prisar på årets Berlinale.
Barnefilmane Todd & Super-Stella og Lars er LOL fekk prisar frå European Children's Film Association. ECFA (European Children's Film Association) organiserer eit nettverk av profesjonelle innan barne- og ungdomsfilm. Målet er å styrke og fremme europeiske barnefilmar av høg kvalitet.
Dei norske komponistane bak musikken til den prislønna serien Makta fekk laurdag kveld den anerkjende Harpa-prisen. Kvart år under Harpa Nordic Film Music Days, som finn stad på den nordiske ambassaden i Berlin, blir HARPA Nordic Film Composers Award delt ut til årets mest framståande nordiske komponist – og set dermed søkelyset på nordisk talent og handverk.
Frøya i Trøndelag fylke vart tildelt den prestisjetunge Juryprisen for beste filmlokasjon av European Film Commissions Network (EUFCN) Location Award 2024. Frøya er den første norske lokasjonen som har vunne denne prisen.
Norsk filminstitutt (NFI) deltok på konferansen "Breaking the 26% Glass Ceiling: Advancing Gender Parity for Women Filmmakers in Europe", organisert av Federation of European Screen Directors (FERA) i samarbeid med European Film Agencies (EFAD).
Anders Tangen, Vibeke Løkkeberg, Elisabeth Sjaastad og Kjersti Mo var blant deltakarane på likestillingseminaret. Foto: NFI
Kjersti Mo, direktør for Norsk filminstitutt og visepresident i EFAD, opna seminaret med å understreke at kjønnsulikskap framleis er eit stort problem i filmbransjen, sjølv etter fleire tiår med innsats for likestilling. Ho peika på at kvinner berre utgjer 26 % av regissørane i europeiske spelefilmar, ein statistikk som ikkje har endra seg det siste tiåret. Mo la vekt på at mangfald og like moglegheiter er avgjerande for kunstnarleg innovasjon og demokratiske verdiar. Ho framheva at offentlege filmfond har eit særleg ansvar og høve til å påverke gjennom finansielle insentiv og målretta tiltak.
Erfaringar frå Noreg viser at økonomiske insentiv fungerer, då 40 % av filmane som får offentleg produksjonsstøtte i dag, er regissert av kvinner. Samtidig åtvara ho mot å nytte film som eit politisk verktøy, og understreka viktigheita av å verne om kunstnarisk fridom, spesielt i ei tid der enkelte statar prøver å avgrense ytringsfridommen.
Vibeke Løkkeberg var en av talarane på arrangementet. Hun delte sine refleksjonar rundt 50 år med kjønnsulikskap i filmbransjen.
Stortingets familie- og kulturkomité reiste til Berlinalen for å møte aktørar frå norsk filmbransje og få innsikt i korleis norsk bransje brukar internasjonale arenaer til finansiering, promotering og sal av norske produksjonar. Virke Produsentforeningen, Den norske filmkommisjonen og den norske ambassaden i Berlin hadde lagt opp eit innhaldsrikt program for komiteen, som inkluderte møter med norsk bransje og internasjonale aktørar. Komiteen fekk òg omvising på den nordiske marknadsstanden, som er ei av plattformene der Norsk filminstitutt fremmer norsk film.
Komiteen møter bransjeaktører i Berlin. Foto: NFI.
