Norske kortfilmar ut i verda – og verda kjem til norske filmfestivalar

– Internasjonale filmfestivalar er blant dei viktigaste visingsarenaene for norsk kortfilm. Det er her filmane møter publikum, og filmskaparar kan knyte kontaktar som er viktige for vidare karriere. For å gjere det mogleg å delta, gir Norsk filminstitutt tilskot til festivalpåmelding og lansering, seier Kjetil Omberg, avdelingsdirektør for publikum og posisjonering i Norsk filminstitutt.

Han peikar på at tilskota gjer det økonomisk lettare for fleire å søkje seg ut til det internasjonale festivalmarknaden, og bidreg til ei profesjonalisering av produsentarbeidet.

– Norsk filminstitutt har samstundes ei rådgivande rolle i dette arbeidet, og vi er i dialog med filmskaparane om å utvikle gode festivalstrategiar, seier Kjetil Omberg.

Dekker påmeldingsavgift

I fjor vart det tildelt 2,9 millionar kroner til internasjonalt arbeid med kortfilm, inkludert reisestipend. Dette er ein klar auke frå tidlegare år. Talet på søknader om lanseringstilskot på internasjonale festivalar auka frå 24 i 2023 til 35 i 2025, samstundes som hele 44 kortfilmar mottok tilskot til påmeldingsavgift. Dette viser eit kortfilmfelt med høge ambisjonar og eit aktivt arbeid for å nå ut internasjonalt. Både kort fiksjon og kortdokumentar er godt representerte, og filmane blir viste på ei rekkje festivalar og marknader.

– Dette gir gode moglegheiter til å møte publikum og byggje nettverk med andre i bransjen. Filmskaparar som ønskjer å vere til stades når filmen blir vist internasjonalt, kan òg søkje reisestipend. I 2025 vart det tildelt over 400 000 kroner i reisestipend til kortfilmskaparar som deltok på internasjonale festivalar, seier avdelingsdirektør Kjetil Omberg.

Norske kortfilmar har delteke på fleire av verdas viktigaste festivalar i perioden 2023–2025, mellom anna Cannes, Tribeca, Sundance, Clermont-Ferrand, Annecy, CPH:DOX og Hot Docs, og norske kortfilmar har blitt nominerte til både Oscar, Gullpalmen og Annie Awards.

Norske filmfestivalar er viktige møteplassar for norske film- og serieskaparar. Denne veka går Kortfilmfestivalen i Grimstad føre seg. Kortfilmfestivalen i Grimstad og Minimalen i Trondheim får tilskot til å invitere internasjonale festivalprogrammerarar, salsagentar og andre bransjeaktørar til Noreg. Dette gjer at norske filmskaparar kan møte sentrale avgjerdstakarar også utan å måtte reise ut, og det gir alle deltakarane på festivalane ei moglegheit til å knyte internasjonale kontaktar. Samstundes får gjestene innsikt i norsk film på nært hald.

Norske festivalar får reisestøtte til internasjonale ekspertar og presse  

I årets søknadsrunde for Utanriksdepartementet si reisestøtte til internasjonale ekspertar og presse har Norsk filminstitutt løyvd midlar til ti festivalar. Tilgjengelege midlar i 2026 var 2,1 millionar kroner.

Norsk filminstitutt gir etter avtale med Utanriksdepartementet tilskot til reiser for internasjonale ekspertar og presse som blir inviterte til norske festivalar og kulturelle arrangement. Denne tilskotsordninga vender seg til arrangørar av festivalar og kulturelle arrangement med fokus på norsk film, seriar og spel. Reisestøtta skal styrkje norsk film, seriar og spel si stilling internasjonalt, i tråd med regjeringa sitt mål om å styrkje norsk kulturliv sine internasjonale moglegheiter, og målet om ein auke på 50 prosent i norsk eksport.  

Kva tilskotsordninga skal bidra til å auke 

• Investering i og sal av norsk film, seriar og spel internasjonalt.
• Bransjekunnskap, marknadskompetanse og internasjonale nettverk i den norske film-, serie- og spelbransjen.
• Merksemd om norsk film, seriar og spel i internasjonale medium.
• Samarbeid og utveksling mellom norske og internasjonale aktørar.

I ordninga blir det mellom anna prioritert prosjekt som har brei representasjon frå bransjen og/eller som på sikt vil bidra til å styrkje profesjonalisering, internasjonalisering og kompetanseheving i den norske film-, serie- og spelbransjen. I tillegg må programmet bestå av eit internasjonalt relevant utval av norske filmar, seriar og/eller spel. Festivalar som har eit eige program for internasjonale bransjedeltakarar som går parallelt med festivalen sitt øvrige program, blir prioriterte. Det internasjonale programmet må vere profesjonelt lagt opp og vere spesielt retta mot utanlandske delegatar som festivalprogrammerarar, distributørar, filmjournalistar og andre bransjefolk som på sikt kan bidra til å fremje norsk film, seriar eller spel.

Utenriksdepartementet