Ein ekstra film i marknadsordninga

I kommande runde av tilskotsordninga for produksjon av spelefilm etter marknadsvurdering med søknadsfrist 11. september er det midlar til å gi tilskot til to filmar på høgt tilskotsnivå og to filmar på lågt tilskotsnivå.  

I tråd med praksisen frå tidlegare år legg Norsk filminstitutt opp til at ein av de to filmane på lågt tilskotsnivå blir valt av konsulent. 

Seks filmar totalt 

– Vi er glade for at vi no har funne rom for å finansiere ytterlegare ein marknadsfilm. Dette er gode nyhende for norsk kinopublikum og filmbransje, seier Kjersti Mo, direktør i Norsk filminstitutt.  

I 2025 er det dermed mogleg å gi tilskot til produksjon av totalt seks filmar etter marknadsvurdering. I tildelingsrunda i juni fekk spelefilmen Julius produksjonstilskot på høgt tilskotsnivå, medan Bukkene Bruse og juletrollet fekk produksjonstilskot på lågt tilskotsnivå.  

Frigjorde EHT-midlar 

Midlane er frigjorde frå budsjettposten for etterhandstilskot (EHT). Denne posten vart satt høgt i starten av året då  Norsk filminstitutt vedtok fondsbudsjett for 2025, for å ta omsyn til estimerte forpliktingar.  

– Intensjonen har i heile år vore at EHT-midlar som er frigjorde skal bli brukt til å finansiere nye spelefilmar. Nå har dette handlingsrommet opna seg, derfor gjer vi desse midlane tilgjengelege i haustens marknadsrunde. Tidlegare rundar har vist at det er eit godt tilfang av sterke prosjekt i denne ordninga, seier Kjersti Mo, direktør i Norsk filminstitutt. 

Om tilskotsordninga 

Tilskotsordninga for produksjon av spelefilm etter marknadsvurdering skal stimulere til spelefilmar med høg kvalitet og høgt publikumspotensial. Tilskot blir gitt på to nivå, såkalla stor og liten ordning.  

Søknadane blir vurderte av eit panel som består av representantar frå filmbransjen og Norsk filminstitutt. I tillegg kan spelefilmkonsulenten velje éin av filmane på det låge tilskotsnivået med publikumsestimat over 150.000. Konsulenten vel ein av filmane ut frå ei vurdering av filmens kunstnariske kvalitetar.