Oslo stumfilmfestival 2026. Foto: Norsk filminstitutt/Stina Færden
Norsk filminstitutt lanserer no ei tilskotsordning for arrangement og aktivitetar på kino. Ordninga skal gi publikum tilgang til eit breitt utval norsk og internasjonal kvalitetsfilm på kino, og styrke kinoen som ein tilgjengeleg, trygg og inkluderande møteplass.
Den nye tilskotsordninga er eit resultat av tiltak foreslått i regjeringas strategi for kino og filmformidling Mer film sammen, og erstattar dagens tilskotsordning for lokale kinotiltak.
Tilskotsordninga skal fremme samarbeid mellom aktørar i bransjen og bidra til eit godt kinotilbod over heile landet. Då ordninga var på høyring, understreka kinoane kor viktig ein desentralisert kinostruktur er.
Den nye ordninga vil gjere det enklare for kinoane og samarbeidspartnarane deira å få til gode tiltak saman, understreker Kjetil Omberg, avdelingsdirektør for publikum og posisjonering ved Norsk filminstitutt.
– Ordninga opnar for nye og kreative samarbeidskonstellasjonar, og legg til rette for at gode initiativ som samlar publikum framfor det store lerretet kan takast i bruk fleire stader. Eit visningskonsept som fyller salane i Nordkapp kino, kan ein bruke også på kinoen i Mandal, seier Kjetil Omberg.
Tilskotsordninga Arrangement og aktivitetar på kino er open for søknader frå 1. juni 2026, med løpande søknadsfrist. Retningslinjene for den nye ordninga er no publiserte.
Norsk filminstitutt inviterer søkarar og andre interesserte til digitalt informasjonsmøte om den nye tilskotsordninga fredag 22. mai kl. 10.00–10.45, med rådgivar ved Norsk filminstitutt Stig Andresen.
Rådgiver formidling
Hold deg oppdatert på siste nytt fra Norsk filminstitutt. Du kan motta informasjon og nyheter knyttet til norske filmer og serier, dataspill eller begge deler.
Du kan velge å motta nyheter idet vi publiserer en sak, vanligvis tre til fem ganger i uken, eller motta en ukentlig oppsummering av nyhetssaker.
