Bokmål Nynorsk

Etterhandstilskot

NFI gir etterhandstilskot til kinofilmar som har mottatt førehandstilskot frå NFI eller regional filmforvaltar – eller som har fått førehandsgodkjenning for etterhandstilskot etter søknad i 2020 eller tidlegare. Etterhandstilskotet er ei automatisk ordning som blir utløyst etter eit visst tal selde kinobillettar i Noreg. Ordninga er retta mot uavhengige produsentar med spelefilm eller dokumentarfilm som primært skal visast på kino i Noreg.

Kven kan søke

Søkaren skal vere et uavhengig produksjonsselskap som er etablert i Noreg eller i eit anna EØS-land, og som har audiovisuell produksjon som hovudformål.
Produksjonsselskapet kan ikkje ha det offentlege som hovudeigar eller ha vesentlege forretningsmessige forbindelsar til prosjektets primære visningsplattform.
Føretaket må vere organisert som aksjeselskap og vere registrert i det norske einings- eller føretaksregisteret.
Søkaren skal kunne dokumentere tilfredsstillande økonomisk, fagleg og praktisk evne til å gjennomføre prosjektet og vere ansvarleg for rekneskapen i prosjektet. Sjå også vilkår for tilskot.

Dette kan du søke om

Etterhandstilskot er eit etterskotsvis produksjonstilskot.
Ordninga er automatisk, og det blir gitt tilskot proporsjonalt med produsentens billettinntekt om vilkåra for ordninga er oppfylte.

Vilkår for tilskot

Du skal samtidig med søknad om produksjonstilskot oppgi om du søker etterhandstilskot. På grunnlag av denne søknaden får du førehandsgodkjenning om etterhandstilskot dersom vilkåra for tilskot elles er oppfylte.
Filmen må ha fått produksjonstilskot frå NFI i samsvar med forskrift om audiovisuell produksjon §§ 3-6 eller 3-7, eller ha fått produksjonstilskot etter § 3-6 frå ein eller fleire regional tilskotsforvaltar, så sant dei regionale produksjonstilskota utgjer minst 25% av utviklings- og produksjonsbudsjettet eller minimum 3 millionar kroner eller meir. Ved utrekning av om terskelen er oppnådd, kan og tilskot frå regionale tilskotsforvaltarar tildelte før 2026 takast med.
Med primærvisning meinast at filmen skal gå på norske kinoar utan tidlegare eller samtidig visning på andre plattformer i minst åtte veker frå filmens norske, landsomfattande premiere.
Det er likevel tillate med samtidig visning på kino i andre land, tidlegare eller samtidig visning på filmfestivalar, eller på spesielle filmkulturelle arrangement i inn- og utland.
Tilskotsmottakaren skal sikre at tilgjengegjering på andre plattformar ikkje fører til at norske kinoar sin moglegheit til vidare visning av filmen fell bort. NFI kan gjere unntak frå dette vilkåret i særlege tilfelle.
Filmen må ha selt minimum 10 000 billettar i ordinær kinodistribusjon i Noreg. Terskelen gjeld for filmar med premiere frå og med 1. januar 2026.
For filmar med premiere før 1. januar 2026 gjeld billettgrensa som er fastsett i tilskotsbrevet.
For filmar utan førehandstilskot søkt førehandsgodkjenning for etterhandstilskot før 1. januar 2021 og som har fått innvilga slik førehandsgodkjenning vil terskelen vere angitt i førehandsgodkjenninga, og vere på enten 35.000 eller 10.000 billettar.
Filmar med tilskot frå NFIs insentivordning kan ikkje søke om etterhandstilskot.
Dersom filmen har fått førehandstilsegn om etterhandstilskot frå NFI, er fristen for å sende endeleg søknad om etterhandstilskot seinast 4 veker før premiere. Dersom fristen ikkje blir overhalden bortfell retten til etterhandstilskotet.
Dersom filmen har mottatt regionalt tilskot som kvalifiserer for etterhandstilskot, skal søknad om etterhandstilskot sendast til NFI innan innsending av dokumentasjon av fullfinansiering til regional tilskotsforvaltar og før igangsetting av produksjonsfasen.
For filmar med førehandsgodkjenning av etterhandstilskot innsendt og bekrefta i 2020 eller tidlegare, og for filmar med produksjonstilskot frå NFI vedtatt før 1. januar 2021, skal det sendast inn endeleg søknad om etterhandstilskot seinast fire veker før kinopremiere. Dersom fristen ikkje blir overhalden, bortfell retten til etterhandstilskotet.

Prioritering og vekting av søknaden

Etterhandstilskotet er ei automatisk ordning. Dersom vilkåra for tilskot er oppfylt vil du få etterhandstilskot. Det blir derfor ikkje gjort prioritering og vekting av søknaden opp mot andre søknader om etterhandstilskot.

Meir om ordninga

Formålet med etterhandstilskotet er å stimulere til solid publikumsoppslutning på kino i Noreg, til utnytting av prosjektets marknadspotensial, til produksjon av barne- og ungdomsfilm og til høg andel av privat kapital i norsk filmproduksjon.
Samla tilskot frå Norsk filminstitutt til utvikling, produksjon og etterhandstilskot kan maksimalt vere 35.000.000 kroner.
Film med tilskot etter § 3-6 (konsulentvurdert film):
- Etterhandstilskotet er maksimalt 20 prosent av utviklings- og produksjonsbudsjettet, og samtidig ikkje over 8.000.000 kroner.
- Maksimalt samla offentleg tilskot er 80 prosent av filmens godkjente rekneskapsførte utviklings- og produksjonskostnader.
Film med tilskot etter § 3-7 (marknadsvurdert film):
- Etterhandstilskotet er maksimalt 50 prosent av utviklings- og produksjonsbudsjettet, og samtidig maksimalt 18.000.000 kroner for filmar som er tildelt produksjonstilskot på 12.000.000 kroner eller høgare, og maksimalt 12.000.000 kroner for filmar som er tildelt produksjonstilskot på under 12.000.000 kroner.
- Maksimalt samla offentleg tilskot er 75 prosent av filmens godkjente rekneskapsførte utviklings,- produksjons- og lanseringskostnader.
Utmåling av etterhandstilskotet:
Etterhandstilskotet utgjer 75 prosent av filmens dokumenterte inntekter eksklusive meirverdiavgift frå distribusjon og sal av visningsrett dei tre første åra etter filmens offentlege primærvisning på kino i Noreg. For barnefilm eller ungdomsfilm utgjer etterhandstilskotet 150 prosent av dokumenterte inntekter.
For filmar med produksjonstilskot etter § 3-7 som har minst 25 % mangfaldsandel utgjer etterhandstilskotet 150 % av dei dokumenterte inntektene. For barne- og ungdomsfilmar med produksjonstilskot etter § 3-7 som har minst 25 % mangfaldsandel, utgjer etterhandstilskotet 200 % av dei dokumenterte inntektene.
Auka utbetalingsrate for etterhandstilskot ved 25 % mangfaldsandel gjeld berre for prosjekt som har fått vedtak om produksjonstilskot frå og med 1. januar 2025.
Mangfald blir målt i nøkkelfunksjonane regi, manus, produsent og hovudrolle.
- Mangfald i regi/manus/produsent blir definert som:
  o Personar som identifiserer seg som samiske
  o Innvandrarar frå eit ikkje-vestleg land
  o Norskfødde med innvandrarforeldre frå ikkje-vestleg land
Med innvandrar meiner ein i denne samanhengen person fødd i utlandet av to utanlandsfødde foreldre og fire utanlandsfødde besteforeldre.
Med ikkje-vestleg land meiner ein i denne samanhengen landbakgrunn frå Afrika, Asia, Amerika utanom USA og Canada, Oseania utanom New Zealand, polare område, Europa utanom EU/EFTA og Storbritannia og nye EU-land etter 2004 (Polen, Litauen, Estland, Latvia, Slovakia, Slovenia, Tsjekkia, Ungarn, Bulgaria, Romania og Kroatia)
- Mangfald i hovudrolle blir definert som:
  o Hovudrolle som identifiserer seg som samisk
  o Hovudrolle som identifiserer seg som nasjonal minoritet
  o Hovudrolle som framstiller person med landbakgrunn frå eit ikkje-vestleg land
  o Hovudrolle som framstiller ein person med funksjonsnedsetjing
  o Hovudrolle som identifiserer seg som lhbt+
Det er den fiktive karakteren som gir utteljing i denne samanhengen. For å oppfylle kriteria må det kome fram at karakteren har identiteten det er snakk om, enten gjennom synlege indikatorar eller gjennom historia som blir fortald.
Omgrepet landbakgrunn frå eit ikkje-vestleg land omfattar meir enn definisjonen av innvandrar og norskfødde med innvandrarforeldre. Omgrepet omfattar mellom anna også karakterar som er adoptert eller har éin forelder som er innvandrar.
Med person med funksjonsnedsetjing meiner ein i denne samanhengen karakterar som er bevegelseshemma, synshemma, høyrselshemma eller utviklingshemma.
Sjå forskrifta for nærare vilkår.
Du finn alle detaljerte krav til søknaden i søknadsportalen.
Produksjonsfagleg rådgivar vurderer søknadene.
Sjå her for ei beskriving av korleis vi saksbehandlar i NFI

Kontaktpersoner

Salma Reiermark Karoliussen

Produksjonsrådgiver