Illustrasjon: NEST
Med «Nordic NEST» går MOIN Filmfond, den tyske føderale filmstyresmakta (FFA) og dei fem nordiske filminstitutta nye vegar innan manusutvikling. I dei komande månadene skal produsentar og manusforfattarar frå Tyskland og dei nordiske landa møtast for å samarbeide om nye idear til spelefilmar og høgkvalitets TV-drama. Dei beste prosjekta vil få manusutviklingsstønad på opp til 80 000 Euro.
NEST symboliserer ein rugekasse for nye idéar, men er òg ei forkorting for New Endeavours in Storytelling, altså nye satsingar innan historieforteljing.
Søknader til Nordic NEST opnar snart for produsentar, og for manusforfattarar frå og med oktober.
Nordic NEST er eit felles initiativ frå MOIN Filmfond Hamburg Schleswig-Holstein og The Five Nordics – ein allianse mellom Det Danske Filminstitut, Finlands filmstiftelse, Islandsk filmsenter, Norsk filminstitutt og Svenska Filminstitutet. På tysk side deltek FFA som samarbeidspartnar. Opningsmøtet i Hamburg blir arrangert i samarbeid med den tyske produsentalliansen.
Kjernen i Nordic NEST er det fem dagar lange NEST Space ved Østersjøkysten i Schleswig-Holstein: i januar 2026 vil ti erfarne manusforfattarar – halvparten frå Tyskland og halvparten frå dei nordiske landa – samlast for å utvikle nye prosjekt. NEST Space blir kuratert av Le Groupe Ouest, eitt av Europas mest nyskapande initiativ innan manusutvikling. Dei står og bak LIM – Less Is More, som Norsk filminstitutt har samarbeida mykje med.
NEST-programmet, utvikla av MOIN Filmfond, har allereie vore vellukka i Tyskland og blir no lansert internasjonalt for første gong. Med Nordic NEST blir det bana veg for eit nytt samarbeid innan internasjonal samutvikling – og det blir lagt eit sterkt grunnlag for framtidige samproduksjonar mellom Tyskland og Norden. Hamburg og Schleswig-Holstein gir det perfekte utgangspunktet.
Hausten 2025: Opning under Filmfest Hamburg Industry Days
60 produsentar, altså 30 frå Tyskland og 30 frå dei nordiske landa, møtest for første gong på eit eindags nettverksarrangement i Hamburg. Utlysinga kjem snart og er retta mot produsentar som har minst éi ferdigstilt og lansert internasjonal fiksjonssamproduksjon bak seg.
Januar 2026: Nordic NEST Space + Göteborg Film Festival
Tidleg i januar 2026 deltek fem tyske og fem nordiske manusforfattarar – kvar med minst to kommersielt lanserte spelefilmar eller serieepisodar bak seg – i Nordic NEST Space ved Østersjøkysten i Schleswig-Holstein. Deretter møter dei 20 utvalde produsentar under Göteborg Film Festival 2026. For kvart prosjekt som fører saman eit tysk og eit nordisk produksjonsselskap under matchmaking-arrangementet, vil MOIN Filmfond automatisk tildele utviklingsstøtte på opptil 20 000 Euro for ein treatment.
Neste fase: Manusstøtte til tre prosjekt
Etter treatment-fasen blir tre prosjekt valde ut til å få ytterlegare manusutviklingsstøtte på opp til 60 000 Euro kvar.
Hausten 2026: Work in progress på Filmfest Hamburg
Sirkelen blir fullført under Filmfest Hamburg 2026, der dei utvikla prosjekta blir presenterte for den internasjonale marknaden.
NEST blir leia og koordinert av produsent Paulina Toenne hos MOIN Filmfond.
MOIN står for Moving Images North. MOIN Filmfond Hamburg Schleswig-Holstein støttar kinofilmar, høgkvalitets seriar og nyskapande audiovisuelle format i alle sjangrar. Med eit årleg budsjett på om lag 21 millionar euro gir dei økonomisk stønad til alle fasar av produksjonen – frå idé til ferdig film. Deira mål er å utvikle den regionale audiovisuelle industrien og å ønskje filmskaparar frå heile verda velkomen til å filme i regionen mellom Nord- og Austersjøen.
Filmförderungsanstalt (FFA) er Tysklands nasjonale filmfinansieringsorgan og støttar alle interesser knytte til tysk film. FFA gir støtte til spelefilmar i alle fasar av produksjon og distribusjon – frå manusutvikling via produksjon til kinodistribusjon, sal og videodistribusjon. I tillegg blir det gitt støtte til kinoar, bevaring av tysk filmarv, promotering av tysk film i utlandet og filmopplæring. Som ein sentral tenesteleverandør for den tyske filmindustrien, samlar og analyserer FFA regelmessig dei viktigaste marknadsdata frå film-, visnings- og videobransjen i Tyskland. FFA samarbeider òg med andre europeiske finansieringsorgan for å støtte utviklinga av grensekryssande prosjekt og samproduksjonar.
The Five Nordics er eit samarbeid mellom dei nordiske filminstitutta.Dei jobbar saman om filmformidling, produksjon, kunnskapsdeling og berekraftig utvikling av filmindustrien.
Den tyske produsentalliansen er den uavhengige og leiande foreininga for tyske produsentar av film, fjernsyn og andre audiovisuelle medium. Med rundt 375 medlemmar innan animasjon, dokumentar, underhaldning, TV, kino og reklame, representerer alliansen dei viktigaste produksjonsselskapa i Tyskland. Dei arbeider nasjonalt og internasjonalt for produsentane sine interesser overfor politikarar, distributørar, tariffpartar og relevante aktørar i medie- og kultursektoren.
Produksjonsrådgiver
Konsulent kompetanse og partnerskap
